Meeryn ass Traa dy Liooar, Jelune 4oo Mee Voaldyn 2026
Ta'n Shirveishagh son Slaynt as Kiarail y Theay, Claire Christian, gra nagh vel baggyrt erbee er ny ratçhyn TT mleeaney, ny yeih dy vel shiartanse dy leih boirit mychione gennid dy lhiabbeeyn ayns Thie Lheihys Noble.
Ayns soie yn Chiare as Feed Jemayrt shoh chaie, yn 28 Mee Averil, va feyshtyn er Bnr Christian, row ablid dy liooar son y taghyrt dy gholl er cummal 'syn aght plannit. Ta aa-scrutaght neu-chrogheydagh er ve reaghit lurg da fwirran lhee shirrey er yn reiltys dy heet stiagh er y chooish, gra dy row gennid trome dy lhiabbeeyn son surransee sthie.
Ren Oltey yn Chiare as Feed son Carbory, Balleychashtal as Malew, Tim Glover, tayrn geill da'n vuilley jeh doilleeidyn bentyn da'n earroo y lhiabbeeyn er yn eaillere mleeaney dy haghyrtyn son roaryn bree. T'eh gra dy jarroo, blein er dy henney, dy row feme er cumrail fer jeh ny seshoonyn roish y TT er coontey ablid neu-freggyrtagh 'sy Thie Lheihys.
Ta Bnr Christian gra nagh vel ee shickyr cre'n taghyrt ta Mnr Glover çheet er, agh dy vod ee son shickyrys ronsaghey ny va ny oyryn ec y traa shen, row shen mooarane dy leih çheet stiagh 'sy rheynn drogh-haghyrt as egin, as nagh vod ad ve rolaue bentyn da shen, agh dy vel yn red smoo scanshoil, shen dy vel ratçhyn goll er cummal, as dy vel ad goll er cummal dy sauçhey.
---oooOooo---
Ta'n Shirveishagh Bun-troggalys, Tim Crookall, gra dy bee dredjal goll er jannoo ayns Purt Ghoolish dagh mee dy yannoo shickyr dy vel diunid dy liooar 'sy phurt son baatyn dy obbraghey dy sauçhey. Hig conaanteyder as schleiyn er-lheh oc stiagh ayn dy chooilleeney obbraghyn lesh keeaght trome dy ghredjal, as ta'n rheyn n treishteil dy jean shen goaill toshiaght er goaill ayns laue doilleeid ayns mean y phuirt, as feme er Colught Paggad Bree Ellan Vannin aa-reaghey y skedjal echey, lesh doilleeid son y vaatey er coontey tidaghyn er y gherrid. Hig toshiaght er yn obbyr dy moghey yn shiaghtin shoh.
Ec y rheynn ta saagh obbree, Tarroo Ushtey, agh cha nel ablid ec shen dy scughey stoo jeant seose jeh cray chreoi as clagh. Va imnea mychione shoh ayns soie yn Chiare as Feed Jemayrt shoh chaie. Ta Mnr Crookall gra, ga dy row eabyn feer vooar jeant dy chooilleeney yn obbyr, nagh daink eh lesh yn rheynn agh ayns paart. T'eh gra dy bee kione currit er yn obbyr dy gheddyn rey rish drone ayns mean y phuirt roish imbagh ny ratçhyn TT, as dy jean shen cur stiagh ayn reesht ablid dy chooilleeney skedjal y Phaggad Bree. T'eh gra dy jean towshanyn roish my vees obbyr jeant as ec jerrey jeh feeraghey cre cho fondagh as t'eh. T'eh gra dy jean y rheynn eisht goaill toshiaght er skedjal dy ghredjal magh y phurt dagh mee dy reayll diunid yn ushtey 'sy phurt eddyr shey meadar as shey meadar dy lieh.
Va feysht currit er Mnr Crookall mychione yn oyr nagh row shoh taghyrt hannah liorish Oltey yn Chiare as Feed son Connaghyn, Julie Edge. T'ee gra dy lhisagh yn rheynn v'eh jannoo shen, as t'ee briaght, row eh failleil y Rheynn Bun-troggalys, as cre'n jantys nee ad goaill ayns laue, er yn oyr dy vel shoh scanshoil bentyn da cochianglys yn Ellan.
Ta Mnr Crookall coardail dy nee feer scanshoil eh son cochianglys yn Ellan, as dy vel yn Rheynn gobbraghey dy çhionn lesh y Phaggad Bree, a) dy chur reaghys er shoh as b) dy yannoo shickyr nagh vel eh taghyrt reesht. Bentyn da quoi ec ta'n currym, t'eh gra dy vel currym er yn rheynn echey son ny puirt, myr shoh s'lhieu ta'n foill.
---oooOooo---
Ta Mnr Crookall goaill rish neesht dy vel vel yn Rheynn Bun-troggalys ayns doilleeid mooar bentyn da goaill laagh marrey ass ard y varina 'sy phurt ayns Purt ny Hinshey.
Cha daink eh lesh y rheynn ayns geddyn kied phlannal son plannyn dy ghoaill laagh varrey seose gys y Veayn Tessenagh dy ghumpal ee ayns shen as eisht dy chur eaghtyr er dy chummal ee 'syn ynnyd. Ec y traa cheddin ta Barrantee Phurt ny Hinshey er chur stiagh aghin noi'n rheynn goll er lesh ymmyd jeh loghan shallidagh dy chummal y laagh varrey.
Va'n phurt er ny dredjal shey bleeaney er dy henney, lesh plannyn dy yannoo shen reesht 'sy vlein shoh çheet.
Ta Mnr Crookall gra nagh jagh y yeearree phlannal trooid, myr shoh dy vel aghin goll er cummal bentyn da shen, dy vel kied phlannal nish ec yn rheynn dy aagail y laagh varrey ayns shen derrey jerrey 2027, agh dy vel aghin noi shen goll er cummal neesht ec y traa t'aynliorish Barrantee Phurt ny Hinshey, as my vees eh çheet lhieu er shen dy vel doilleeid feer vooar ec yn rheynn. T'eh gra dy vel yn doilleeid ec yn rheynn neesht dy vel Marina Phurt ny Hinshey ayns feme jeh dredjal reesht ayns traa giare dy liooar.
---oooOooo---
Va Mnr Crookall as Lhiass Ard Fer Oik yn Rheynn Bun-troggalys, Jeffrey Robinson, cur feanish roish Bing Aa-scrutee son Polasee er y Çhymmyltaght as Bun-troggalys. Ta Mnr Robinson gra dy vel cooishyn bunnidagh feer vooar roish y reiltys bentyn da Purt Aer Ellan Vannin, as dy vel feme er jannoo tooilley dy yannoo smoo reen eh 'syn aght t'ee gobbraghey. Ta Mnr Robinson gra nagh vel eh cooney lesh cooishyn dy vel greienyn ass date oc as gennid dy stiureyderyn traaght aer ayn.
Ta Mnr Robinson gra dy vel shoh feer doillee dy eaysley, as dy vel eh goaill three, kiare, queig bleeaney dy chur er peiagh ennagh ve traenit as trooid yn oardagh dy ve abyl dy chooilleeney y paart shen – ny sodjey na t'eh goaill dy heet dy ve ny stiureyder etlan, myr sampleyr. T'eh gra, myr shoh, dy vel y driaght shen liauyr, dy row y stayd lesh Covid cur brishey 'sy driaght shen, myr shoh, gollrish ymmodee fir elley dy vel ad cur eab er couyral veih shen.
Cooish elley v'ad loayrt mychione 'sy Ving shen, shen Stashoon Marrey Leyrphoyl. Cha nel fys er ve currit roish y theay foast er y chostys jeh. Ta argane eddyr yn Rheynn Bun-troggalys as parteayssyn elley 'sy chalee, as myr shoh cha nel yn earroo s'jerree er ve reaghit foast, agh ta eear Hirveishagh son Bun-troggalys, as Oltey yn Chiare as Feed son Rushen, yn Dr Michelle Haywood, gra dy vel ee jerkal rish y costys dy ve ny shlee na £70 millioon punt, ga dy vel eear oltey politicagh y rheynn, as Oltey yn Chiare as Feed son Rhumsaa, Lawrie Hooper, gra dy vel eh dy feer ny shlee na £100 millioon punt.
Ta Mnr Robinson gra dy vel yn rheynn er ve cur eab er jannoo obbyr er ny oardaghyn echey, er ny couyryn oc as jeeaghyn er jeadys son cliaghtey share bentyn da reirey profeshoonagh jeh shalee, er yn oyr, er-lesh, dy vel son shickyrs annoonid t'er ve oc 'sy traa t'er n'gholl shaghey, as dy daink eh dy ve baghtal dy mooar lesh yn eiyrtys jeh'n shalee ayns Leyrphoyl. T'eh gra dy vel yn rheynn er vaih argid ayns reireyderyn shalee, agh nagh vel ad er vaih argid ayns couyryn son yn oik çheu-chooylloo jeu, vees cummal seose shen, vees dy ghra nagh vel ad jannoo ny cur ayns oardyr, freayll recortyssyn, reirey fyseree dy mie, ny dy vel ad jannoo ymmyd jeh couyr costallagh son reirey shalee dy yannoo paart beg jeh shen, as a) nagh vel shen ny t'ad mie dy yannoo, as b) nagh vel ymmyd mie jeh'n traa oc.
Ta Mnr Robinson gra, myr shoh, dy vel ad er ve cur eab er ynsaghey veih jeadys cre vees y cliaghtey share shen bentyn da'n oik 'sy chooylrey, as dy vel ad goaill toshiaght er cur couyryn stiagh 'syn oik shen 'sy chooylrey, as foddee nagh vel shen yn ard cho jesh, agh ayns rieughid, y bart dy obbyr vees er n'gholl lurg y chooish stiagh ayns yn lheid as Leyrphoyl, raad t'ad er n'gholl stiagh ayns argane leighoil, as ta jeihyn, mannagh vel eh cheeadyn dy housaneyn dy ghocamaidyn ayns shen, nagh vel er ve currit dy mie ayns stoyr, nagh vel shen agh soilshaghey magh da cre cho moal as t'ad er chouyryn da'n ayrn shen 'sy traa t'er n'gholl shaghey as dy vel eh red ennagh t'ad cur eab er karraghey choud's t'ad goll er oai.
---oooOooo---
Lurg arganeyn liauyr rish tammylt liauyr mychione ronney jeh Billey Gurneilys Ynnydagh (Lhiassaghey), ren yn Shirveishagh son Bun-troggalys, Mnr Crookall, cur treealtys roish yn Chiare as Feed Jemayrt shoh chaie son ronney queig dy ve scryssit magh, as va shen coardit.
Va imnea ec lughtyn-reill ynnydoil dy row y ronney cur pooar da'n Rheynn Bun-troggalys dy chur currym erbee orroo, agh gyn feme er reaghey dy beagh argid currit daue dy yannoo shen. V'ad gra dy row shen neu-chairagh as dy row eh cur rour pooar da'n Rheynn gyn cur ersyn feme dy yannoo reaghyssyn kiart son ny v'eh dy yannoo.
Ren Olteyn yn Chiare as Feed son Rhumsaa, Lawrie Hooper, votal noi'n treealtys dy gheddyn rey rish ronney queig.
Ta'n eear Hirveishagh son Bun-troggalys, y Dr Michelle Haywood, gra dy row towse feer vooar dy skeealyn neu-chiart currit mygeayrt mychione y ronney queig treealit, as t'ee credjal dy row yn resooney magh va freayll rish goll mychione ronney queig tayrn geill ersooyl veih cooishyn scanshoil elley dy yannoo slattys gys yn date.
Ta'n Dr Haywood gra dy vel ish beggan mollit, er yn oyr dy voddagh ee fakin dy cleeir y feeuid jeh ronney queig, as dy ren ad ceau traa dy liooar soilshaghey magh shen as dy dug ad feanish da Coonceil ny Shirveishee, agh dy vod ee fakin eh veih çheu lane-phragmatagh y chooish dy vel feme ain er cooishyn elley 'sy Villey Gurneil Ynnydagh (Lhiassaghey) dy heet dy ve breeoil, as dy row argane as resooney magh va goll er bentyn da ronney queig, as paart jeh veih far-yss feer vooar, agh dy row argane goll er tayrn geill ersooyl veih'n Shirveishagh Crookall geddyn cooid er-mayrn y villey trooid.
Ta'n Dr Haywood gra dy vel ec cooid er-mayrn y villey ta ayrnyn feer scanshoil mychione clou giare-hennaghyssyn as coontyssyn, as gurneil ynnydagh foshlit as lane-vaghtal as reirey co-streeaghyn dy chooishyn, vees ny ghoilleeid dy feer harrish kuse dy lughtyn-reill ynnydoil ec y traa t'ayn. T'ee gra myr shoh, dy vod ee ayns aght co-ennaghtyn rish mian Mnr Crookall dy gheddyn y billey trooid as harrish y linney, as dy vel y billey er ve goll mygeayrt rish mysh hoght bleeaney, as nagh vel eh er n'gholl er oai.
Er-lesh yn Dr Haywood dy beagh y red keeayllagh nish, as er-lheh my vees shin goaill magh y red shen er-lheh, lhiassaghey da Slattys Slaynt y Theay 1990 vees jannoo ynnyd jeelym ny churrym slattyssagh as cur eh er lughtyn-reill ynnydoil, nagh vod peiagh erbee gra dy vel ad shooyl ersooyl, nagh vod peiagh erbee gra nagh jean ad cur ard son aa-ymmyd er yn oyr nagh vel ad geearree jannoo shen, rere y chostys, jus goaill ayns laue eh liorish jannoo reaghys er ny caghlaaghyn currym, as lhiassaghey y meer dy clattys vees cooie da shen.
---oooOooo---
Foddee dy beagh caa dy yannoo ymmyd jeh famlagh myr toarrey son yn eirinys reesht. Ta'n Rheynn Çhymmyltaght, Bee as Eirinys gra dy vel eh goaill ayns laue ny t'eh çheet er myr peesh beg dy obbyr dy yeeaghyn er cummys son ymmyd jeh'n stoo vees ayn dy dooghyssagh. T'eh gra dy vel shoh feyshtyn liorish fir er-lheh er y gherrid, ayns paart er coontey y stayd eddyr-ashoonagh geo-pholitickagh ec y traa t'ayn as y builley jeh shen er toarrey ve ry gheddyn, as yn prios jeh eer my vees.
Ayns soie yn Chiare as Feed Jemayrt shoh chaie, hug yn Shirveishagh son Çhymmyltaght, Bee as Eirinys, Clare Barber, fys da olteynyn er y chooish. T'ee gra, car ny bleeaney t'er n'gholl shaghey, dy vel ee er n'gheddyn feyshtyn, oddys famlagh vees currit sheese dy dooghyssagh goll er çhymsaghey veih traieyn son ymmyd toarrey eirinagh. Er coontey ny feyshtyn shen, as y stayd s'hea geo-pholitickagh ec y traa t'ayn, as y builley jeh er priosyn son toarrey as y feddynaght jeh, dy vel y rheynn currit da peesh beg dy obbyr dy ronsaghey reihyn elley, lesh famlagh vees currit sheese dy dooghyssagh jannoo seose paart jeh'n obbyr shoh. T'ee gra dy vel yn chied cheim jeh shoh dy hessal mooadys yn aggyrt as ny feeuidyn jeantagh jeh lheid erbee y jannoo, vees goaill stiagh coloayrtyssyn bentyn da lughtyn-reill ynnydoil, as enn currit orroo myr parteayssyn scanshoil cochianglt rish y pheesh dy obbyr shoh.
Ta Bnr Barber gra dy vel yn Rheynn, son yn oyr shoh, myr toshiaght er screeu rish cleree ny lughtyn-reill ynnydoil dy gheddyn magh barelyn ny barrantee, as ec y cheim moghey shoh, nagh jean cowrey erbee ec y traa shoh jannoo seose currym dy ghoaill ayrn ayns treealtys erbee ry heet, my vees y lheid ayn. Liorish shoh, t'ee gra dy vel yn Rheynn shirrey fys veih obbyr jeant roïe ec yn Rheynn , goaill stiagh briwnys yn Unnid son Coadey y Çhymmyltaght dy vod seyrsnys ve currit ec y traa t'ayn son cur famlagh er thalloo, ny lhie er conaantyn bentyn da coadey y çhymmyltaght. T'ee gra dy bee'n peesh ronsoil dy obbyr goll er cummal ayns ny meeaghyn shoh çheet, as dy jean eh goaill stiagh tooilley ronsaght as coloayrtys rish rish sleih ta cochianglt dy mooar rish y chooish.
---oooOooo---
Ta Caairlagh Barrantee Carbory as Rushen, Kirrie Jenkins, gra dy vel y gennid dy yss mychione y ghowaltys geayee treealit, Cair Vie, jannoo seose oyr son ve mollit. T'ee credjal nagh row fys noa er ve currit liorish Lught-reill Bun-shirveishyn Vannin mychione y shalee treealit son Earystane neayr's Mee Vayrt nurree, as dy vel cummaltee er ve faagit ayns boayl follym.
Ta'n lught-reill ynnydoil er screeu rish olteynyn Tinvaal dy hirrey orroo dy aa-scrutaghey treealtyssyn Lught-reill Bun-shirveishyn Vannin roish my vees oardaghyn formoil cur lhiettrimmys orroo loayrt mychione y chooish.
Ta Bnr Jenkins gra dy vel fys er ve currit da'n Voayrd dy vel yeearree feer faggys da ve currit stiagh ayn, as dy vel eamyn er jeet stiagh da ny Barrantee veih kuse dy chummaltee , t'er chur roish yn imnea shen, as neesht veih sheshaghtyn neu-reiltysagh, as myr sampleyr nagh vel y possan eco-oaylleeagh giallit son sleih cochianglt rish y chooish er jeet dy ayn, myr shoh dy vel shiartanse dy vaarnaghyn 'syn oardagh shen, as dy vel ad fakin veih ynnyd eggey Lught-reill Bun-shirveishyn Vannin hene nagh row agh feer veg er ve clouit rish ny sodjey na blein, as myr shoh dy vel boayl follym ayn , ayn nagh vod y pobble ynnydagh geddyn entreilys da fys erbee, as nagh vel shen, dy cleeir, mie son peiagh erbee.
Ta Bnr Jenkins gra dy vel shin er nakin hannah veih'n treealtys mooie veih'n choose, Mooir Vannin, cho leah's ta oardaghyn formoil goaill toshiaght, dy vod olteynyn reiht çheet dy ve fo lhiettrimmyssyn smoo er cre choud's foddee ad loayrt mychione y chooish rish y theay, as er-lheh raad ta coyrle leighoil cochianglt rish, as myr shoh dy vel yn imnea veih Barrantee Carbory as Rushen dy vel feme er cooilleeney ny keimyn shoh dy moghey, as dy vel scrutaght, my vees eh jeant ro anmagh, as dy vel barelyn er n'ghoaill toshiaght hannah er çheet dy ve soit, nagh jean ad geddyn eiyrtys mie jeh.
Ta Bnr Jenkins gra dy vel ad cur eab er cur reayrt harrish ooilley, as myn-phoyntyn ayn, jeh ny ardyn as ayndaue ta imneaghyn ec y Voayrd. T'ee gra dy by vaghtal eh dy nee cooish feer chramp ee, as dy vel ymmodee caghlaaghyn jantys, myr shoh dy vel y Boayrd feer chleeir 'sy screeuyn echey, nagh vel eh soilshaghey magh barel er ny feeuidyn rere plannal, agh dy vel ad son shickyrys goaill y cheeayll chionnit veih'n oardagh plannal er Mooir Vannin mooie veih'n choose.
---oooOooo---
Ta Oltey yn Chiare as Feed son Rhumsaa, yn Fer-lhee Alex Allinson, gra nagh jean eh cur stiagh myr shirreyder 'sy reihys mooar cadjin Mean Fouyir mleeaney. Va'n Fer-lhee Allinson reiht hoshiaght 'sy vlein 2016.
Ayns fogrey ayns ny meanyn sheshoil, ta'n Fer-lhee Allinson gra dy nee onnor v'echey dy ve ny haghter ayns Tinvaal ass-lieh cummaltee y rheynn reihyssagh, as t'eh cur booise daue son treishteil aynsyn as cooney lesh. T'eh gra neesht dy vel eh goaill moyrn ass ny t'er jeet lesh yn Ellan 'sy traa echey myr politickeyr ashoonagh, agh t'eh goaill rish dy vel cumrail er jeet er ny tosheeaghtyn ard scanshoil bentyn da thieys as entreilys da shirveishyn slaynt ynnydoil.
Ta'n Fer-lhee Allinson gra dy vel eh currit da jannoo shickyr dy vel y Billey Geddyn Baase lesh Cooney geddyn Kied Reeoil, as t'eh soilshaghey magh agenda jarrooagh son yn traa ry heet 'sy traa er-mayrn echey myr Oltey yn Chiare as Feed. Ta kuse dy chaghlaaghyn er ve draghtit da'n Villey ayns eab dy ghoaill ayns laue ny imneaghyn ta Airaght Cairys y Reeriaght Unnaneysit er jeet er myr oyryn nagh vel eh arryltagh dy choyrlaghey y Billey son Kied Reeoil.
T'eh fo'n Er-lhee Allinson cur kiare lhiassaghyn roish Tinvaal Mean Souree, goaill stiagh fer dy choadey fir aasit t'ayns gaue jeh co-eignaghey, as fer cur currym er yn Ard Vaylee dy chooilleeney aa-scrutaght lurg baase lesh cooney dy yannoo shickyr dy row dy chooilley red jeant rere yn clattys. T'eh credjal dy jean ny caghlaaghyn shoh cur-rish ny cooishyn va'n Airaght Cairys shirrey dy ve currit myr ayrn jeh'n Vun-clattys, shaghey ve faagit dy ve currit ayns fo-clattys ny linnaghyn stiuree.
Bee slane resooney magh jeh ny lhiassaghyn mastey olteynyn Tinvaal Mean Souree.
---oooOooo---
Ta'n vreid er ve tayrnit veih plannyn liorish y Recortys Meanagh dy niartaghey y creatlagh bentyn da shellooderaght foayssagh jeh colughtyn. Ta'n Recortys geearree jannoo bun gys y date jeh shellooder foayssagh as feme er ve recortit, as dy chaghlaa y fys femoil mannagh vel y lheid ayn.
Bee caghlaaghyn treealit da Slattys Shellooderaght Foayssagh 2017 currit roish Tinvaal y vee shoh trooid Oardyr yn Tashtey. Ta'n Shirveishagh son Gastid Dellal, as Oltey yn Chiare as Feed son Ayrey as Maayl, Tim Johnston, gra dy vel shennaghys mie ec yn Ellan jeh baghtalys er colughtyn. T'eh gra dy vel ny treealtyssyn shoh niartaghey ny sodjey reill yn Ellan bentyn da shellooderaght foayssagh liorish shareaghey y mieys, y kiartys as y barrantys jeh fysseree 'sy stoyr data er shellooderaght foayssagh, ayns aght vees freggyrtagh da stundayrtyn eddyr-ashoonagh.
Ta Mnr Johnston gra, liorish jannoo shickyr dy vel fysseree jeh ard vieys er shellooderaght foayssagh goll er freayll 'sy stoyr data, dy vel shoh cooney dy choadey yn Ellan veih ny gaueyn cochianglt rish niee argid, cur argid son atçhimys as cur argid ny shirveishyn argidoil vees cummal seose lhiassaghey, kionnaghey, ny skeayley-magh wappinyn çhesh-veanagh, kemmigagh, bio-oaylleeagh ny radio-oaylleeagh, choud's t'eh aa-niartaghey goo mie yn Ellan myr ynnyd argidoil eddyr-ashoonagh vees goll er reill dy mie as vees co-obbragh.