Meeryn ass Traa dy Liooar, Jelhune 19oo Jerrey Fouyir 2026
Jemayrt yn 13 Jerrey Fouyir, haink Olteynyn yn Chiare as Feed cooidjagh dy chlashtyn oraid veih ny shirreyderyn hug stiagh nyn enmyn dy ve'n Ard Shirveishagh, as lurg yn oraid va caa da olteynyn cur feyshtyn er yn daa hirreyder, va Kirrie Jenkins, Oltey yn Chiare as Feed son Carbory, Balleychashtal as Malew, as Chris Thomas, Oltey yn Chiare as Feed son Doolish Veanagh.
Lurg ny oraidyn as ny feyshtyn, va teiy goll er cummal, as haink eh magh dy row shey olteynyn ayns foayr jeh Bnr Jenkins – shen dy ghra :
• Bnr Jenkins hene;
• Oltey yn Chiare as Feed son Glionfaba as Purt ny Hinshey, ren enmyssey Bnr Jenkins, Katryna Baptist;
• Oltey yn Chiare as Feed son Ayrey as Maayl, ren niartaghey yn enmyssey, Stephen Broad;
• Olteynyn yn Chiare as Feed son Garff, Richard Henthorn as Vicki Hewison; as
• Oltey yn Chiare as Feed son Rushen, Michael Crowe.
Va 16 oltey ayns foayr jeh Mnr Thomas –
• Mnr Thomas hene;
• Olteynyn yn Chiare as Feed son Connaghyn, Rob Callister as yn Dr Rachel Glover;
• Olteynyn yn Chiare as Feed son Doolish Hiar, Joney Faragher as Andy Saunders;
• Olteynyn yn Chiare as Feed son Doolish Hwoaie, David Ashford as Damian Ciapelli;
• Oltey yn Chiare as Feed son Doolish Veanagh, Peter Shimmin;
• Olteynyn yn Chiare as Feed son Doolish Yiass, Claire Christian as Sarah Maltby;
• Oltey yn Chiare as Feed son Glionfaba as Purt ny Hinshey, Daniel Davison;
• Olteynyn yn Chiare as Feed son Middle, James Cochrane as Jane Poole-Wilson, ren niartaghey enmyssey Mnr Thomas;
• Olteynyn yn Chiare as Feed son Rhumsaa, Robert Cowell, ren enmyssey Mnr Thomas, as Juan McGuinness; as
• Oltey yn Chiare as Feed son Rushen, Mark Kemp.
Cha row daa ennym ry gheddyn ayns yn daa rolley shen : Alfred Cannan as Jason Moorhouse.
Va Oltey yn Chiare as Feed son Carbory, Balleychashtal as Malew, Jason Moorhouse, gra nagh row eh er n'yannoo briwnys er yn aght dy cheau teiy lurg da lhaih yn daa vanifesto, as dy row eh son eaishtagh rish Bnr Jenkins as Mnr Thomas y moghrey shen choud's va'n cur oraid as cur freggyrtyn da feyshtynyn va currit orroo, as eer ec jerrey yn oardagh shen, tra haink eh dy cheau teiy, dy row eh smooinaghtyn dy beagh yn derrey yeh ny'n jeh elley mie dy leeideil yn lught-reill noa, myr shoh ren eh cur teiy da ny jees jeu, as shen dy ghra dy row y teiy echey scryssit magh.
Ta Mnr Cannan gra dy row eh ceau teiy noi'n daa hirreyder, as dy row shen er yn oyr, dy beagh yn earroo dy heiy-yn er ve ny sniessey, nagh row eh geearree y teiy echey dy ve dy liooar dy chur yn eiyrtys ayns foayr jeh Mnr Thomas, va'n reih-hirreyder echey. T'eh gra, 'syn aght shen, dy beagh feysht ennagh, row currym ec Mnr Thomas dy ve ny Ard Shirveishagh. Agh myr haink eh magh, va eiyrtys baghtal ry akin, dy row yn chooid smoo dy olteynyn ayns foayr jeh Mnr Thomas.
Va feysht currit da olteynyn, row ad ayns foayr jeh'n derrey hirreyder, as lurg shen va feysht currit daue, row ad ayns foayr jeh'n shirreyder elley. Dy ve recortit, va feme er yn daa heiy ec dagh oltey ve condaigagh. 'Syn aght ren Mnr Moorhouse eh, ren eh ceau teiy ass-lieh yn daa hirreyder, myr shoh va'n teiy echey scryssit magh, as 'syn aght ren Mnr Cannan, ren eh ceau teiy noi ny neesht jeu, as myr shoh va'n teiy echey scryssit magh.
As yn chooish reaghit hannah, ta teiy feeraghey goll er jannoo, as foddee dy vel shen caa da olteynyn dy hoilshaghey magh dy vel ad ooilley son obbraghey cooidjagh dy stiurey cooishyn yn Ellan. Ayns yn teiy feeraghey, ren Mnr Cannan as Mnr Moorhouse recortey teiy ayns foayr jeh Mnr Thomas, agh va foast daa heiy noi echey, as va shen veih'n oltey ren niartaghey enmyssyn Bnr Jenkins, Stephen Broad (Ayrey as Maayl), as veih Bnr Jenkins hene.
Haink yn teiy ren soilshaghey magh dy nee Mnr Thomas va'n Ard Shirveishagh beggan lurg munlaa, Jemayrt yn 13 Jerrey Fouyir, as ec lieh oor lurg jees hie Mnr Thomas gys Thie y Reiltys dy gheddyn teisht myr Ard Shirveishagh veih'n Lhiass-chiannoort, yn Reejerey John Lorimer. Va nah churrym Mnr Thomas dy hymsaghey cooidjagh kuse dy olteynyn dy ve nyn shirveishee as olteynyn Coonceil ny Shirveishee. Agh she possible eh dy ren Mnr Thomas briaght jeh oltey ennagh dy heet stiagh 'sy lught-reill echey, agh nagh row yn oltey shen arryltagh dy yannoo shen. Cha nel fys ain er, row shen yn aght ny dyn.
Ta olteynyn Coonceil ny Shirveishee resooney magh cooishyn ny mast'oc, as foddee nagh row ad ayns foayr jeh cooish as dy ren ad arganey noi eck, agh mannagh vel eh çheet lhieu noi'n tromlagh ayns Coonceil ny Shirveishee, tra ta'n chooish shen goll er cur roish Tinvaal myr kiarail y lught-reill, ta currym cooidjagh er olteynyn Coonceil ny Shirveishee, as t'ad ooilley ceau teiy ayns foayr jeh'n chooish shen.
Chammah's yn Ard Shirveishagh hene, rere yn abbyrlhit bentyn da ny rheynnyn, ta –
• Shirveishagh son Bun-troggalys;
• Shirveishagh son Çhymmyltaght, Bee as Eirinys;
• Shirveishagh son Cooishyn Sthie;
• Shirveishagh son Gastid Dellal;
• Shirveishagh son Oik Coonceil ny Shirveishee;
• Shirveishagh son Slaynt as Kiarail y Theay;
• Shirveishagh Tashtee; as
• Shirveishagh son Ynsagh, Spoyrt as Cultoor
Ren Alfred Cannan cur er bun neesht Shirveishagh elley, Shirveishagh gyn Portfolio, agh cha nel Mnr Thomas er phointeil peiagh erbee da'n phaart shen, as t'eh jeeaghyn dy vel eh fosyn aghtey myr yn Shirveishagh son Oik Coonceil ny Shirveishee, myr shoh ayns ynnyd jeh bloc dy yeih teiy-yn v'ec Mnr Cannan dy gheddyn, bee bloc dy hoght teiy-yn ec Mnr Thomas.
Ta Mnr Thomas er vograghey magh ennym ny shirveishee echey, as myr shoh, ta caa dooin jeeaghyn er nyolteynyn reiht dy ve nyn shirveishee ayns lught-reill Mnr Thomas.
As hoshiaght, yn Shirveishagh son Bun-troggalys, as shen Oltey yn Chiare as Feed aa-reiht son Carbory, Balleychashtal as Malew, Jason Moorhouse.
Ta keim ec Mnr Moorhouse veih Schoill Cooishyn Tarmaynagh Lunnin, as rish kuse dy vleeantyn v'eh ny er ynsee ayns Scoill Ard Cashtal Rushen ayns Balleychashtal, as eh gynsaghey cooishyn tarmaynagh.
Lurg da Mnr Moorhouse ve reiht da'n Chiare as Feed yn chied cheayrt 'sy vlein 2016, shoh yn trass cheayrt da ve reiht, as cha nel eh er ve ny Hirveishagh roish nish. Dy jarroo, ayns traa y lught-thie s'jerree, cha row eh arryltagh dy ve oltey politickagh jeh rheynn erbee. T'eh er chur ymmodee feysht ayns yn Chiare as Feed as ayns Tinvaal – mysh 900 dy eyshtyn ooilley cooidjagh ayns ny queig bleeaney t'er n'gholl shaghey, vees jannoo seose bunnys yn lieh-ayrn jeh ooilley ny feyshtyn currit liorish cooid er-mayrn ny olteynyn cooidjagh.
Ta Mnr Moorhouse er ve ny oltey jeh bingyn reiht, agh va shiartanse dy leih briaght row eh jannoo dy liooar. Ren eear oltey yn rheynn reihys echey 'sy whaiyl shoh chaie, Tim Glover, cur gys lieh Mnr Moorhouse dy row eh fuirraghtyn derrey va sleih jeeaghyn dy ve boirit mychione cooish, as eisht dy row eh cur feysht mychione eck, dy lhiggey er dy row eh jannoo red ennagh, agh nagh row eh ny lhie agh er airt y gheay politickagh.
Ta sleih dy mennick gaccan mychione reddyn jeant ny lhiggit harrish ec yn Rheynn Bun-troggalys, as ta shiartanse dy leih jeeaghyn er myr oik doillee son yn shirveishagh.
Myr Shirveishagh son Çhymmyltaght, Bee as Eirinys, ta Mnr Thomas er reih yn Dr Rachel Glover, as ish noa-reiht son Connaghyn. T'ee mie er enn son yn obbyr eck ayns cur er bun seyrlann dy yannoo prowalyssyn bentyn da Covid Mee Vayrt 2020, dy row eiyrtyssyn jeh prowalyssyn ry gheddyn y laa cheddin. T'ee ny skeeandagh as t'ee er stiurey colught hug ee er bun dy ronsaghey cooishyn bentyn da bea-oaylleeaght, y çhymmyltaght as çhagnoaylleeaght. T'ee er veeraghey nagh jean ee wheesh son y cholught shen choud's t'ee ny politickeyr.
Roish my dug yn Dr Glover y colught shen er bun, ren ee ceau traa liauyr y liooar ayns obbraghey son reiltys y Reeriaght Unnaneysit 'syn Undinys son Ronsaghey Bee as y Çhymmyltaght. T'ee er ve ny treishteilagh jeh Treisht Bea-feie Vannin neayr's 2019.
'Sy vanifesto eck, ren yn Dr Glover cremmey Plan yn Rheynn Çhymmyltaght, Bee as Eirinys er Shickyrys Bee, as t'ee gra dy vel ee soit er fysseree as y rheynn hene goaill rish nagh vel ny fysseree shen echey. V'ee shirrey freggyrtyn mychione yn towse dy vee vees ayns rieughid goll er troarey ayns shoh; cre vees yn sthock as stoyr jeh bee t'ayn my vees ny baatyn scuirr veih goll; as cre cho reen ta ny troaryn ain bentyn da caghlaa emshyraght.
Ta'n Dr Glover gra dy vel ee currit da clou fysseree er ny cooishyn shoh dagh blein, dy vod cummaltee Vannin fakin wheesh as ta'n Ellan abyl dy hroarey bee er-e-hon hene, quoid dy laghyn oddys yn Ellan goll gyn bee çheet stiagh ayn, myr shoh vel shickyrys bee ain ny dyn. Myr shoh, nish t'ee 'syn oik kiart dy chooilleeney ny kiarailyn shen.
Ta Oltey yn Chiare as Feed aa-reiht son Middle, Jane Poole-Wilson, cummal yn oik eck myr yn Shirveishagh son Cairys as Cooishyn Sthie. V'ee 'syn oik shen trooid y clane traa jeh'n lught-reill shoh chaie neesht. T'ee ny turneyr agh nagh vel gobbraghey myr shen, as v'ee ny Oltey jeh'n Choonceil Slattyssagh roish my daink ee dy ve reiht da'n Chiare as Feed 2021.
Ta currym er y rheynn shoh dy chur lhiettrimmys er loghtyn gollrish niee argid, er cur argid son atçhimeyderys as son lughtyn-reill neu-leighoil, er ymmyrkey as creck druggaghyn as jannoo ymmyd jeh argid vees ry gheddyn veih creck druggaghyn, as er kimmeeys cyber, as son cur bree da stundayrtyn eddyr-ashoonagh ayns cooishyn argidoil.
Lesh scruteyderyn ass-lieh Moneyval 'syn Ellan ec y traa t'ayn dy yeeaghyn er yn aght ta'n Ellan freayll smaght er ny cooishyn shoh, cha nyrrys eh dy vel Bnr Poole-Wilson tannaghtyn 'syn oik myr yn Shirveishagh son Cairys as Cooishyn Sthie, as mooarane obbyr ve jeant fo oaseirys Bnr Poole-Wilson ayns ny bleeantyn jeieanagh, myr shoh t'ee mie-ynsit ayns stayd y clattys vees cur bree da ny reddyn shoh, as abyl dy loayrt rish scruteyderyn Moneyval my-nyn-gione.
Ren Oltey yn Chiare as Feed noa-reiht son Rhumsaa, Robert Cowell, enmyssey Mnr Thomas dy ve'n Ard Shirveishagh, as ta Mnr Thomas er phointeil Mnr Cowell dy ve'n Shirveishagh son Gastid Dellal.
Va Mnr Cowell roish nish Barrantagh Rhumsaa, as traa echey myr Caairlagh y Voayrd, as ren eh shirrey ynnyd ayns yn Chiare as Feed 'sy reihys mooar cadjin 2021. 'Sy vlein 2012 hug eh er bun colught 'sy cherroo oltaghey echey ayns Rhumsaa.
'Sy Rheynn Gastid Dellal, bee currym er Mnr Cowell son lhiassaghey tarmaynagh as son croo çhymmyltaght argidoil ayn ta lught-traghtee ynnydoil goll er pohlldal as bishaghey, as vees cleayney delleyderyn noa dy chur er bun colughtyn 'syn Ellan. Bee fys ec Mnr Cowell ass keeayll chionnit er ny doolaneyn fo shellooderyn thieyn dellal 'syn Ellan.
Va Claire Christian aa-reiht myr Oltey yn Chiare as Feed son Doolish Yiass, as haink ee stiagh 'sy lught-reill Alfred Cannan dy ve'n Shirveishagh son Slaynt as Kiarail y Theay ayns ynnyd jeh Lawrie Hooper tra ren eshyn irree ass doaltattymagh Mee Houney 2024. Ta Mnr Thomas er hirrey urree dy hannaghtyn 'syn oik shen 'sy lught-reill echey.
Va Bnr Christian reiht hoshiaght myr Oltey yn Chiare as Feed son Doolish Yiass ayns fo-reihys 2020, as eisht v'ee aa-reiht 'sy reihys mooar cadjin 'sy nah vlein. Va colught eck dy chreck eaddeeyn, as v'ee rieau shirrey dy phohlldal colughtyn beggey. Myr cooyl-vinkeydere, haink ee cooidjagh ayns parteeas neu-formoil marish Mnr Thomas as eear Oltey yn Chiare as Feed son Connaghyn, Julie Edge, dy chur feyshtyn er reiltys Mnr Cannan, agh v'ee arryltagh dy heet stiagh 'sy lught-reill echey 'sy Rheynn Slaynt as Kiarail y Theay.
Neayr's shen, fo'n oaseirys eck, ta kuse dy chaghlaaghyn er jeet çheusthie jeh'n shirveish claynt, lesh reaghey son tooilley feeackleyryn dy ve ayn, nagh vel sleih fuirraghtyn as ny enmyn oc er rollaghyn faarkee; va scrutaght jeant dy bieau er doilleeidyn lesh yn earroo dy lhiabbeeyn ayns Thie Lheihys Noble; as ta toshiaght er ve currit er plannyn son cassan bentyn da autism ayns fir aasit as cur enn er Doghan Hyper-lheiltys son Laccalys ayns Jeeraghey.
Va Bnr Christian baghtal ayns gra dy by vie lhee goll er-ash gys y Rheynn Slaynt as Kiarail y Theay lurg jee ve aa-reiht. Agh ta foast mooarane ry yannoo, lesh doilleeidyn bentyn da costyssyn as briwnys dy ve jeant er Kiarail Vannin, va currit er bun lurg aa-scrutaght as moylley 'sy tuarastyl jeant ec yn Reejerey Jonathan Michael.
She coontysseyr ta Michael Crowe, va noa-reiht myr Oltey yn Chiare as Feed son Rushen, as ta Mnr Thomas er phointeil eh dy ve'n Shirveishagh Tashtee. Lurg 27 blein as feed gobbraghey 'sy cherroo argidoil, haink eh dy ve Ard Sheckter jeh jantys y Rheynn Gastid Dellal, Argid Ellan Vannin, 'sy vlein 2018, myr shoh ta fys echey er yn aght ta cooishyn y reiltys gobbraghey veih ny hoght bleeaney echey ayns shen.
She politickeyr va moir Mnr Crowe, Pam Crowe, va Oltey yn Chiare as Feed son Rushen veih 1996 gys 2003, as eisht v'ee Olteyn y Choonceil Slattyssagh rish queig bleeaney. Ec y traa shen haink ee dy ve'n Shirveishagh son Gurneil Ynnydagh as y Çhymmyltaght – red ennagh nagh vel taghyrt 'sy lhing shoh, lesh shirveishee reiht veih mastey yn Chiare as Feed ynrican.
As yn rheynn s'jerree, rere yn abbyrlhit, as shen yn Rheynn Ynsee, Spoyrt as Cultoor, as she Oltey yn Chiare as Feed aa-reiht son Doolish Yiass, Sarah Maltby, ta goaill y currym shen.
Lesh yn daa oltey son Doolish Yiass ve nyn shirveishee – Claire Christian as Sarah Maltby – foddee nagh bee wheesh traa oc son cooishyn cummaltee y rheynn reihys hene. Shoh yn chied cheayrt ta oltey Partee Obbraghys Vannin er jeet dy ve shirveishagh.
Ta Bnr Maltby geiyrt er yn ayr eck stiagh 'sy pholitickagh, as shen David Cretney, va Oltey yn Chiare as Feed veih 1985 gys 2015, as eisht va Oltey yn Choonceil Slattyssagh veih 2015 gys 2020. Roish my daink Bnr Maltby stiagh 'sy pholitickaght tra v'ee reiht hoshiaght 'sy vlein 2021, v'ee gobbraghey myr kiaraileyder, as myr Ard Fer Oik son Pohlldal Ynsee, tra v'ee gobbraghey rish sleih aegey lesh femeyn cramp elley bentyn da'n ynsagh as da'n claynt oc.
Rish daa vlein neesht t'ee er ve oltey politickagh y Rheynn Ynsee, Spoyrt as Cultoor, myr shoh ta keeayll chionnit eck hannah er currym as obbyr y rheynn.
Myr shoh, shen ny feallee bee nyn soie mygeayrt y voayrd ayns Coonceil ny Shirveishee. Agh eisht ta sleih nagh vel, as ga dy dooyrt Mnr Thomas dy row eh treishteil ec y traa haink eh dy ve reiht myr Ard Shirveishagh dy row eh treishteil dy beagh caa da dy obbraghey rish Bnr Jenkins, cha nel ee 'sy rolley shen. Cha nel shen dy ghra nagh ren Mnr Thomas shirrey urree dy ve ny shirveishagh – foddee dy ren, agh nagh row ee arryltagh. Cha ren ee ceau teiy er-son Mnr Thomas eer ayns y teiy feeraghey, tra ren daa oltey as feed soilshaghey magh dy row ad ayns foayr jeh Mnr Thomas, agh lesh Bnr Jenkins ceau teiy noi shen, as shen myr v'eh lesh yn oltey noa-reiht son Ayrey as Maayl ren enmyssey Bnr Jenkins dy ve'n Ard Shirveishagh, Stephen Broad.
Cha nel Rob Callister ny hirveishagh noadyr, ga dy row eh yn chied oltey dy chur mygeayrt manifesto son shen. Agh ta Mnr Callister er ve Caairlagh y Ving Phlannal rish tammylt, as foddee dy jean eh goll stiagh 'syn oik shen reesht.
Cha row oik currit da'n eear Ard Shirveishagh noadyr, Alfred Cannan. Myr cheayll shin, ren Mnr Cannan jeh yioin freayll y teiy echey ersooyl veih'n daa hirreyder, er yn oyr nagh row eh geearree y reih echey dy chur y teiy gys y derrey heu ny gys y çheu elley, as foddee dy beagh eh doillee çheet gys y voayrd reesht myr shirveishagh fo ard shirveishagh elley.
Agh chammah's yn oik myr Caairlagh y Ving Phlannal, ta oikyn elley myr Caairlagh Lught-reill Bun-shirveishyn Vannin, as jeh ny buird clattyssagh. As ga nagh vel Mnr Thomas er phointeil Shirveishagh Oik Coonceil ny Shirveishee ny Shirveishagh gyn Portfolio ec y traa t'ayn, foddee dy bee bree currit da ny oikyn shen reesht 'sy traa ry heet.
Va arganeys neesht kuse dy vleeantyn er dy henney, nee streeu dy chooishyn v'ayn bentyn da currym son Cairys, row eh kiart dy chur shen stiagh lesh Cooishyn Sthie, dy row yn Shirveishagh ayns shen ronsaghey, as jannoo briwnys er, cooishyn bentyn da ny meoiryn shee as olteynyn fwirran pryssoon Ellan Vannin, ta fo churrym y rheynn cheddin. Agh dy hanmagh 'sy vlein 2020 va'n reaghys jeant dy beagh Shirveishagh son Cairys as Cooishyn Sthie, ny yeih y streeu cummyssagh dy chooishyn ayns shen. Foddee, 'sy traa ry heet, dy beagh shirveishagh er-lheh son Cairys, myr va goll er coyrlaghey roish my row y reaghys shen jeant.
As dy jarroo, ta Mnr Thomas gra, 'sy vanifesto echey dy ve'n Ard Shirveishagh, dy row eh çheet er Shirveishagh son Thieys as Polasee Plannal, as dy vel eh foast goll er lesh jeeaghyn er lheead currym y phaart shen, feaysley magh ny veagh eh, as dy row loayrtys mychione Shirveishagh son Aghtyn dy Yannoo Fondagh, as s'cosoylagh eh dy vel paart ayns cochianglyssyn mooie 'syn Ellan, 'nagh cheddin as t'ayn ayns Jersey, myr shoh dy vel kuse dy phaartyn, agh dy row eh shickyr dy bollagh 'syn aigney echey, roish y chione shiaghtin, dy row feme echey er pointeil da ooilley ny rheynnyn.
Ta Caairlagh Boayrd Barrantee Balleychashtal yn eear Ard Shirveishagh, Tony Brown, as t'eh gra nagh vod eh loayrt ass-lieh ny lughtyn-reill ynnydoil elley, agh dy beagh y barel echey eh, as dy vel eh shickyr dy beagh eh ec e chumraagyn er y voayrd neesht, shen dy vel shin maynrey dy cho-obbraghey rish gurneil ynnydagh stiagh gys y Rheynn Bun-troggalys ayns buill dy jarroo dy vel eh dy baghtal jeh vondeish da, as cummal seose, femeyn ny cummaltee oc. Shoh lurg da Oltey yn Chiare as Feed son Carbory, Ballachashtal as Malew, Jason Moorhouse, cheet dy ve'n Shirveishagh son Bun-troggalys.
Ta Mnr Brown gra dy vel ny Barrantee ayns shen dy ghoaill kiarail jeh Balleychashtal myr balley, as dy bunnidagh, gyn jeh monney elley, as dy nee paart scanshoil yn eh shen, er y fa ta buill gollrish Balleychashtal feer chramp, dy vel mooarane bun-troggalys oc.
Ta Mnr Brown gra, bentyn dauesyn hene ayns Balleychashtal, dy vel cochianglys mooar oc rish y rheynn er yn oyr dy vel puirt oc, dy vel raaidyn mooarey oc, dy vel oc reesht scoillyn as reddyn elley, myr shoh son cochianglys mie dy ve ayn rish y rheynn as rish yn shirveishagh, dy nee scanshoil shen, agh cha nel shen dy ghra dy vel eh agh yn aght dy vel ny Barrantee jannoo ynrican ny ta'n rheynn geearree ad dy yannoo, ny vice versa, dy vel paart ec ny neesht dy chooilleeney, as dy lhisagh shen ec ny Barrantee y ve, as t'eh treishteil dy bee eh, dy vod ad ve cho fondagh as oddys ad y ve lesh cooney y reiltys, 'sy voayl ta feme er.
Ta Mnr Brown gra dy vel pointeil shirveishee neu-chramp dy liooar, sessal as cur eab er ny olteynyn t'ayns yn Chiare as Feed, as dy jarroo ayns Tinvaal, er yn oyr dy vod shirveishee ve ayd veih Olteynyn y Choonceil Slattyssagh, agh dy vel y cliaghtey er ve ayn rish kuse dy vleeantyn dy vel ad ynrican veih'n Chiare as Feed, as dy row ooilley ny shirveishee echey veih'n Chiare as Feed, agh dy vel eh neu-chramp as dy vel yn ard shirveishagh cur eab er jannoo shickyr dy vel toiggalys echey rish ny feallee t'eh geearree dy ve nyn shirveishee.
Ta Mnr Brown gra nagh vel fys echey er yn aght ta ard shirveishee roish nish er chur-rish shoh, dy row eshyn dy bollagh neu-chramp, dy row yn chied red va jeant echey rish peiagh erbee v'eh jeeaghyn dy phointeil myr shirveishagh, va shen dy chur cuirrey orroo dy heet stiagh ayn, dy insh daue yn aght v'eh gobbraghey as eisht gra roo, bailloo obbraghey 'sy skimmee rere ny çhiarmyn as ny conaantyn shoh. T'eh gra, dy bunnidagh, veih çheu echey y skeeal, my vees ad gobbraghey dy creoi, gaghtey dy oney, as dy ve arrymagh bentyn da reddyn inshit daue dy follit as dy chur arrym da ny cumraagyn oc ayns Coonceil ny Shirveishee, as son cochianglys obbrree mie dy ve oc lesh olteynyn elley Tinvaal.
Ta Mnr Brown gra, mannagh row ad arryltagh dy yannoo shen, nagh jinnagh eh er chur cuirrey orroo dy ve ny hirveishagh. Er-lesh, myr shoh, dy vel eh gollrish veagh dellal, dy vel oo geddyn sleih mygeayrt-y-mood t'ou credjal nee jannoo nyn gooidshare son yn Ellan, as sleih as t'ou booiagh dy liooar dy vod oo cur barrant ayndaue dy aghtey dy oney as dy aghtey dy currymagh ayns oik theayagh.
Ta Sheshaght Lught-traghtee Ellan Vannin gra dy vel ee treishteil dy jean Coonceil noa ny Shirveishee cur er yn ard chiarail oc çheet dy ve jeant ayns aght vees goll er towse. T'ee er chur moylley da Mnr Thomas son eaishtagh rish y lught-traghtee, as t'ee goltaghey y trimmid baghtal er smooinaghtyn er aghtyn dy ghreesaghey dellal as er toiggalys bentyn da'n tarmaynys. T'ee gra dy nee scanshoil eh dy vel y reiltys noa gaghtey dy tappee. T'ee cur eam son reillyn co-reiragh, briwnyssyn jeant ny s'tappee, as treealtyssyn baghtal jeh vondeish da'n Ellan.
Ta Eaghtyrane y Heshaght, Claire Watterson, gra dy ren y reihys mooar cadjin shoh er chur trimmid smoo er, nagh vel bishaghey tarmaynagh myr currym er un rheynn y reiltys ynrican, agh dy vel paart ec dagh rheynn ayns croo staydyn son tarmaynys stroshey, smoo cohirreydagh, vees ry chummal seose. T'ee gra dy vel yn Sheshaght aarloo dy obbraghey dy jarrooagh rish y lught-reill noa dy chooney dy livrey y bieauid, y focus as ny jantyssyn ayns rieughid ta dellal as speeideilys yn Ellan 'sy traa ry heet feme.
Bentyn da'n oik echey, ta Mnr Thomas gra, 'sy Ghaelg, dy vel Ard Shirveishagh, rere y toiggalys echey, cochianglt rish yn er syrjey, gollrish yn chied er mastey fir chorrym rish, shen t'eh dy ghra 'sy Vaarle, agh nagh nee ard sheckter as caairlagh Coonceil ny Shirveishee eh, dy vel eh yn chied er mastey fir chorrym rish, as dy vel shen red ennagh t'eh er chur trimmid er rish ny cumraagyn echey.
Ta'n Shirveishagh son Bun-troggalys, Jason Moorhouse, gra dy row eh gennaghtyn feer vie Jeheiney shoh chaie, dy ren dy chooilley pheiagh loayrt, dy ren dy chooilley pheiagh eaishtagh, dy row dy chooilley pheiagh dy baghtal jeeaghyn son yn aght kiart dy chur freggyrt da ny va goll er gra, myr shoh dy row bree dy feer ayns ny v'ad dy yannoo bentyn da cur freggyrt da sleih, as gobbraghey dy gholl ayns rieughid dy gheddyn ny eiyrtyssyn ta sleih shirrey, as dy row eh kiune, dy row eh smooinaghtagh, dy row eh mychione jannoo eh ayns aght vees ry akin myr goaill ayns laue jantys as geddyn eiyrtyssyn son sleih dy jarroo geearree.
Ta Mnr Moorhouse gra dy daag eh yn shamyr as v'eh smooinaghtyn dy jarroo dy oddys shoh ve speeideilagh, as dy vel feme er shoh ve speeideilagh, er yn oyr dy vel shin ayns ynnyd doolaneagh, ,myr shoh dy treishteilagh dy vel shin er y raad kiart nish, as dy treishteilagh dy bee dy chooilley red shen er-son ta'n theay treishteil.
Er-lesh Mnr Moorhouse dy vel y red ard scanshoil, shen aght y leeideilagh, as t'eh gra rish ny jeih bleeaney ny queig bleeaney jeig shoh chaie dy vel leeideilee auto-vainstyragh ain t'er ve ec y voayrd, er hoilshaghey magh y raad, as jerkal rish sleih obbraghey lioroo as cur reddyn er nyn doshiaght. T'eh gra dy vel Chris Thomas ny smoo ny ghooinney, gollrish Donald Gelling, ayns rieughid, ta jeeaghyn er mieys y phersoon as ny oddys y peiagh shen cur-lesh gys y voayrd, as greinnaghey as pohlldal, as dy treishteilagh dy jean shen tannaghtyn ayn, er yn oyr nagh vel yn aght shen red ennagh ta shin er nakin rish ymmodee bleeantyn, as dy vel eh red ennagh as ta feme ec yn Ellan er.
Ta Mnr Moorhouse gra, bentyn da'n chaghlaa shen, dy row eh red ennagh va goll er çheet er reesht as reesht Jeheiney, myr shoh nagh row eh dy ve dellal 'syn aght cadjin, dy row eh smooinaghtyn er yn aght oddys ad jannoo eh dy vel ry gheddyn ass ny eiyrtyssyn ta'n theay dy gheearee, as dy vel adsyn geearee, as dy row eh goaill ayns laue reddyn ayns aght elley, son shickyrys.
Ta Mnr Moorhouse gra dy vel yn Ard Shirveishagh jeeaghyn er ny ta feme echey er dy chur Coonceil ny Shirveishee as corrym ayn, er ta feme ec y çheer, as dy vel eh jeeaghyn er yn aght share dy lhieeney baarnaghyn, as dy chur cooidjagh ynnydyn elley erbee as foddee dy bee feme orroo, myr shoh dy yiarragh eshyn dy beagh shen traa erbee eddyr nish as y Nollick dy bee caa mie son shen, agh er-lesh nagh lhisagh shin ve shirrey dy mooar son caghlaa çhelleeragh, as er-lesh dy vel eh cooish son lhiassaghey as geddyn ny feallee share ayns ny paartyn share, myr shoh dy jean shen goaill laghyn, mannagh vel eh shiaghteeyn, agh dy treishteilagh dy jean mayd roshtyn shen.
Ta olteynyn noa-reiht da'n Chiare as Feed mastey shirveishee, agh er-lesh Mnr Moorhouse dy bee mooarane er-nyn-son ooilley dy ynsaghey, bentyn da dy chooilley red caghlaa as va feme er caghlaa, as çheusthie jeh'n çhamyr shen dy vel three eear hirveishee, as dy vel cooid er-mayrn jeu thalk noa da, myr shoh dy vel eh er-nyn-son dy obbraghey cooidjagh as dy gheddyn ny eiyrtyssyn share son yn ashoon, myr shoh she traa greesee ta shin ayn, as dy vel ad gennaghtyn y currym shen, dy vel feme orroo jannoo reddyn ayns aght elley, ayns aght share, as dy vel eh treishteil dy bee shen ry akin liorish y theay ayns ny laghyn ry heet.
Ta Mnr Moorhouse gra dy vel feme ain cooinaghtyn er ec dy chooilley hraa dy row eh y theay hug ad stiagh ayns shen, dy nee teiy y theay v'ayn, as er-lesh dy row eh baghtal, dy row eh ry akin ny smoo 2026 na er dy rieau nagh vel eh Doolish Smoo as freayll rish goll 'syn aght ren ad roish nish, dy vel eh dy chur-lhieu er-oai agenda elley as jannoo shickyr dy vel bree currit da shen, myr shoh er-lesh dy vel shen 'sy chied ynnyd ayns nyn smooinaghtyn, agh ec y traa cheddin er-lesh dy vel sharvaantyn y steat cur geill da shen, nagh vel eh dellal 'syn aght cadjin, dy vel shoh red elley.
Ta Mnr Moorhouse gra dy row yn chied eysht currit er tra hie eh stiagh 'sy Rheynn Bun-troggalys, dy row shen y rolley echey, shen v'eh geearree jannoo, as dy row y freggyrt neu-chramp echey dy row eh geearree jannoo dy chooilley red t'ad dy yannoo, 'syn aght share vees possible, as dy vel feme er eiyrtyssyn ve oc ta ry howse dy hoilshaghey magh dy vel ad ayns rieughid er n'yannoo ny share, as dy vel ad shareaghey. T'eh gra, dy chur lesh stiagh ayn nheeghyn noa elley ayns rheynn cho cramp, nagh vel shen agh dy yerkal rish doilleeidyn, myr ta shin er vakin ayns ny jeih bleeaney t'er n'gholl shaghey.
Ta Mnr Moorhouse gra dy vel ooilley vees feme er jannoo, shen jeeraghey er geddyn ny eiyrtyssyn share bentyn da ny raaidyn, bentyn da'n phurt aer, bentyn da ny ta sleih dy yerkal roo dy ve freggyrtagh da ny jerkalyssyn shen, myr shoh dy vel mooarane ry yannoo, agh dy vel fys ec y theay er ny vees femoil er jannoo, as dy jean ad freayll arrey. T'eh gra, ayns aght, dy vel eh freayll rish ve neu-chramp, gyn jeeraghey er ny cooishyn ry lhiattee, agh dy vel y doilleeid mooar erskyn ooilley, shen agh mooadys ny doolaneyn shen, er yn oyr dy vel eer red ennagh cho neu-chramp as meer raaidey, dy bee doolaneyn fo shen.
Ta Mnr Moorhouse gra dy vel doolaneyn ayn, agh dy vel ad currit da ve freggyrtagh da ny doolaneyn shen, as dy vel eh lane femoil, son yn Ellan, dy vel sleih fakin y caghlaa, dy vel ad fakin ny reddyn elley, myr shoh nagh vod cur harrish ve ain ayns un oie, agh dy vel feme orroo goll er-oai as tayrn geill sleih da dy vel reddyn caghlaa.